പയ്യന്നൂർ: ഓൺലൈനിലൂടെ തട്ടിപ്പ് അരങ്ങേറിയ രണ്ടു സംഭവങ്ങളിലൂടെ പയ്യന്നൂരിൽനിന്നു തട്ടിയെടുത്തത് 40 ലക്ഷത്തോളം രൂപ. ഷെയർ മാർക്കറ്റിംഗിന്‍റെ പേരിൽ പയ്യന്നൂർ കൊക്കാനിശേരിയിലെ കുഞ്ഞപ്പന്‍റെ 34 ലക്ഷവും രാമന്തളി കുന്നരുവിലെ 32 കാരിയുടെ 6,12,146 രൂപയും നഷ്ടമായെന്ന പരാതിയിൽ പയ്യന്നൂർ പോലീസ് കേസെടുത്തു.
കഴിഞ്ഞ മാസം ആറുമുതൽ 24 വരെയുള്ള ദിവസങ്ങളിലാണ് കുഞ്ഞപ്പൻ വഞ്ചിക്കപ്പെട്ടത്. എച്ച്ഡിഎഫ്സി വിഐപി എന്ന ആപ്പിലൂടെയാണ് തട്ടിപ്പിനു കളമൊരുക്കിയത്. ഈ ആപ്പിൽ ഓൺലൈനിലൂടെ പണം നിക്ഷേപിച്ചാൽ കൂടുതൽ ലാഭം ലഭിക്കുമെന്ന് വിശ്വസിപ്പിച്ചതായി പരാതിയിൽ പറയുന്നു.
ഇതേത്തുടർന്ന് ആപ്പിലെ വിവിധ അക്കൗണ്ടുകളിലേക്ക് പരാതിക്കാരന്‍റെ അക്കൗണ്ടിൽനിന്ന് 11, 25,000 രൂപ ഫോൺ ബാങ്കിംഗ് വഴിയും ഐഎംപിഎസ് വഴിയും തവണകളായി അടയ്ക്കുകയായിരുന്നു. ബാങ്കിന്‍റെ പേരിലുള്ള സംവിധാനമെന്ന് തെറ്റിദ്ധരിച്ച് ലോണിനത്തിൽ 20,00,000 രൂപയും അടച്ചു. വാഗ്ദാനം ചെയ്ത ലാഭമിനത്തിൽ 2,75,000 രൂപയുമടക്കം 34 ലക്ഷം രൂപയുടെ വഞ്ചനയാണ് നടന്നതെന്ന് പരാതിയിൽ പറയുന്നു.
വാഗ്ദാന പ്രകാരം നിക്ഷേപവും ലാഭവിഹിതവും ലഭിക്കാത്തതിനെത്തുടർന്ന് നടത്തിയ അന്വേഷണത്തിൽ കബളിപ്പിക്കപ്പെട്ടതായി ബോധ്യമായതിനെത്തുടർന്നാണ് പരാതിയുമായി പോലീസിനെ സമീപിച്ചത്. തട്ടിപ്പ് ഓസ്ട്രേലിയൻ കമ്പനിയുടെ പേരിലും രാമന്തളി കുന്നരുവിലെ യുവതിയുടെ പരാതിയിൽ കോഴിക്കോട് സ്വദേശിനി പ്രീതി, ഓസ്ട്രേലിയൻ കമ്പനിയായ ഹാർവെ നോർമൽ എന്നിവർക്കെതിരേയാണ് പയ്യന്നൂർ പോലീസ് കേസെടുത്തത്. കഴിഞ്ഞ മാസം 22 മുതൽ 31 വരെയുള്ള ദിവസങ്ങളിലായിരുന്നു തട്ടിപ്പ് അരങ്ങേറിയത്.
പ്രസ്തുത കമ്പനിയിൽ ഓൺലൈനായി പണം നിക്ഷേപിച്ചാൽ കൂടുതൽ ലാഭം ലഭിക്കുമെന്ന് വിശ്വസിപ്പിച്ചായിരുന്നു തട്ടിപ്പു നടത്തിയതെന്നു പരാതിയിൽ പറയുന്നു. മൊബൈൽ ബാങ്കിംഗ് വഴി പരാതിക്കാരി തന്‍റെ അക്കൗണ്ടിൽ നിന്നും 6,12,146 രൂപയാണ് കമ്പനിയുടെ വിവിധ അക്കൗണ്ടുകളിലേക്ക് നിക്ഷേപിച്ചത്. പിന്നീട് യാതൊരു വിവരവും ലഭിക്കാത്തതിനെത്തുടർന്ന് താൻ വഞ്ചിക്കപ്പെടുകയായിരുന്നുവെന്ന് ബോധ്യപ്പെട്ടപ്പോഴാണ് പോലീസിനെ സമീപിച്ചത്.
